Lei Cantejadas a Peiròlas (13)

Lei CANTEJADAS de PEIRÒLAS (13)

Aquest an, lei organisators istoriques dei Cantejadas de s'Ais de Provença avián decidat de faire una pausa, per mielh se preparar e faire l'an que ven dei Cantejadas de 2011 una capitada dei grandas !
Aquò èra sensa comptar sus la còla dei mèstres e dei mestressas de Peiròlas, que faguèron cantar quatre classas de seis escòlas (una classa de l'escóla mairala, e tres dau primari), amé una classa convidada de Valensòla ! Tot aquò fasià pròchi de 120 escolans !

L'Aeloc fuguèt associada a l'eveniment, que se debanèt lo 18 de junh.

Vaquí l'istòri de l'organisacion d'aquest eveniment, que nous es contada per Bernat, un dei mèstres de Peiròlas.

"CANTEJADAS 2010 DE PEIROLO EN PROUVÈNÇO"

« I’aura pas de Cantejadas 2010 ! » Vaqui ço que se diguè après li Cantejadas 2009

Acò se pòu pas !

Alor, « la Chourmo de Peirolo » e « l’Ome de Valensole » s’acampéron e decidéron de faire camin soulet pèr que l’eimo di Cantejadas boufe encaro

Pèr que l’afaire se posque faire, a faugu trouva lou biais de travaia ensèn : « Tu, vendras faire d’Inglès à mi pichot e d’aquéu tèms, iéu farai canta en Prouvençau li pichot de la meiralo! » Ansin se faguè. L’ome de Valensole, éu, travaiara soulet sus soun planestéu

Ato ! Acò vai. Es eisa de decida. Mai fau saupre que pèr li Cantejadas, fau de musician, de materiau, un càri pèr que l’Ome de Valensole pousquesse veni canta me nautre.

Fuguè l’escasénço de quauqui dejuna dòu dissate matin, encò de l’uno o de l’autro di fiho de la chourmo emé forço cafè, tè, creissent, pan au choucoulat lou bon cousta di causo !

Lou proublèmo di musician fugué lèu regla : n’iaura ges ! Aurié pouscu avé li proufessour de l’ecolo de musico, mai a pas capita : avien de cartabèu proun clafi. Aurié pouscu avé lis musician de l’ourquestro dòu village, mai poudién pas trouva de moumen pèr travaia ensèn. Restavo plus que li C.D. de travai di Cantejadas passado Acò bouito ! De très n’en farén un ! Alor, avén causi li cansoun de pourta au prougrame. Un cop la chausido facho, quaucun diguè : « E perque farien pas chausi lis enfant bord que d’ùni an dejà canta i Cantejadas ? Belèu qu’an de cansoun que i’agradon mai que d’autro ? » N’en vaqui un’ideio di bono ! Mai pèr aquelo de cansoun, la musico nous agrado par forço ! bè, n’en trouvarèn uno autro ! E piéi avén tambén pensa d’apoundre au repertòri, uno cansoun qu’avien pas encaro presentado i Cantejadas. Vo ! Mai pèr la musico, coume faran ? Bè, lou Gille nous l’alestira ! E lou Gille nous l’alestiguè ! Ensin, « pachin, pachan » lou C.D. fuguè acaba !

Alor coumencéron li repeticioun, lou travai que chascun couneisse Acò vai, sabèn lou faire.

Mai a faugu tambèn ana veire lou Conse pèr agué soun acord d’ourganisa cò sus sa coumuno, pèr agué lou materiau necessàri, pèr lou gousta di pichotli direitour nous an ajuda.

Avian besoun de dardeno per lou càri de l’ome de Valensole fin que pousquesse davala de soun planestèu. L’A.E.L.OC nous ajudè

E la teinico ???? Sabés faire tu ? Noun e tu ? Nimai ! Urousamén i’avié lou Jan-Lu pèr nous ajuda!

Alor, aven vist que l’eimo di Cantejadas boufavo encaro

E vengué lou divendre 18 de jun, à Peirolo, dins la salo Frederic Mistral

Aro, soun passado li Cantejadas 2010 de Peirolo en Prouvenço. Lis enfant éron countènt, si gènt eron esmougu e nautre.creba ! Creba mai fier dou travai de nòsti pichot. Segur qu’emé de musician, dins la coure dòu castèu aurié esta un flame espetacle

Mai l’impourtant fuguè que la Lengo resclantigue toujours e que boufe, aquest’an encaro l’eimo di Cantejadas

Osco pèr li Cantejadas de 2011

Bernat

Data de creacion : 27/08/2009 - 15:43
Darriera modificacion : 02/12/2010 - 10:12
Categoria : Archius - Projèctes culturaus-2009/2010

Pagina legida 12858 còps