Siatz aquí :   Benvenguda » Lo rendut còmpte dau collòqui de 2017
    Estampar la pagina...

Lo rendut còmpte dau collòqui de 2017

COULÒQUI DE ROUSSET

25 de Nouvèmbre 2017

LA LENGA D’ÒC E LA QUESTIEN DE L’IDENTITAT

Lei colòquis de l’AELOC cadencien totei lei dos ans la vida de nòstre malhum en proposant lo solet recampament regionau d’amplor sus l’ensenhament de la lenga e lei condiciens de sa trasmissien. Lo dogième despuei la creacien de l’associacien inaugura una refleissien urgènta sus la questien de l’identitat, sorsa de debats apassionats e de divisiens fonsas dins la societat nacionala e mai regionala. Changis e apòrts siguèron de tot biais apreciats unanimament pèr sa qualitat requista.

Fotò Maria-Francesa LAMOTTE

salle.jpg

Si tratavo proumié de metre lou sujèt dins la perspeitivo de l’ensignamen qu’es la toco de l’AELOC : un brèu rapèu de la situacien en mitan escoulàri presenta pèr Natalìo Wurbel n’en moustravo à la fes leis avançado indenegablo despuei lei tres o quatre darniérei decenìo e lei feble permanènt, crusamen mes en valour pèr lei estatistico despietadoué dei dous reitourat regiounau : mens de 3% deis escoulan, 2 % dei coulegian, 1 % dei licean soun touca pèr aquel ensignamen, e rèsto de saché à quin nivèu d’eficacita pèr cadun.

1. Natalìo Wurbel. Lei chifro óuficialo deis Academié de-z-Ais-Marsiho e de Niço. Addenda     

Mirelha Benedetti, s’apielant sus lei competèncis que li conferisson sa foncien d’elegida regionala e d’ajoncha ais afaires escolaris a La Ciutat, s’estudiava puei de destriar l’identitat regionala pèr qunta la novèla mandatura a decidat de fisar una missien a n un dei Vici-Presidènts dau Consèu Regionau, Felipe Vitel, e que l’assemblada regionala a votat en sa favor una de sei promierei deliberaciens en Junh 2016.

2. Mirèlha Benedetti. L’identitat regionala

Representant lou Direitour Academique dei Servìci de l’Educacien Naciounalo dei Bouco dóu Rose, Pèire Blache, Ispeitour de l’Educacien Naciounalo dins lou relarg mounte si tenié lou coulòqui, rapelavo l’interès pourta pèr soun Amenistracien à-n-aqueu taié, e reprenié l’istourique dóu proujèt especifique qu’a permés au despartamen de lou desvouloupa d’un biais tant óuriginau que proumetèire.

3. Intervencien de l’Ispeitour Pèire Blache representant lou Direitour Academique

Imatge e montatge Michel Neumuller

.

Falié puei quadrar lou councèpte meme d’identitat dins sa relacien mé lei lengas de França, e a n aquela escomessa si confrontava Crestian Lagarde, professor a l’Universitat de Perpinhan, qu’avié acetat de remplaçar Pascau Ottavi de l’Universitat de Corte previst pèr lo programa e empachat pèr resons de santat. Dins un espausat d’una clartat perfèta, sintetisava l’evolucien de l’estatut dei lengas de França dins lei dos darniers siècles, puei espausava leis apròchas fondamentalas dau concèpte d’identitat en s’apielant sus leis òbras de Frederic Barth, de Gièli Deleuze e Fèli Gattari, e mai de Pau Ricœur, pèr oposar una concepcien costrencha pèr la pressien dau grope a n una demarcha mai liberada, a la promiera respondènt lo sentiment d’apartenènci, la metafòra de la racina, la nocien de « memetat » unifòrma ; a la segonda la nocien de referènci, l’imagi botanique dau risòma, e lo concèpte d’ipseïtat segon Pau Ricœur, possibilitat d’èstre si meme dins tota la diversitat de chasque individu

4. Lei lengas de França davant la questien de l’identitat. Intervencien dau Professor Crestian Lagarde.

Lo tèxte de l'intervencion, e lei diapositivas de la presentacion.

Sus d’aquélei baso, e après un dialogue emé l’assistànci, Pèire Blache menavo emé rigour e gàubi un riche debat que fasié interveni, à l’entour de Crestian Lagarde, uno Direitriço d’escolo meirenalo, nouasto coulègo Marìo-Franceso Lamotte, un proufessour d’óucitan-lengo d’ò, nouaste coulègo Matiéu Poitavin, e Abdelhac Elhadi, Direitour deis Acuei de Lesé de la Vilo de La Ciéutat que desvouloupo un vaste proujèt d’aprocho de la lengo d’o en relacien mé leis escolo publico.

5. Uno lengo pèr recampa. Debat anima pèr l’Ispeitour Pèire Blache

Registrament audiò : aquodaqui.info

IMG_20171125_173316.jpg

Miquèu Montanaro, après d’aguer rapelat la granda diversitat deis òuriginas de son grope familhau, mostrava coma lei changis norrisson chasca identitat sènsa l’entamenar, mai en acompanhant seis evoluciens immancablas. Aquela demarcha d’integracien s’es incarnada dins lo vilagi varés de Correns que sa dinamica s’es desvolopada en concomitanci mé l’istalacien dau Centre de creacien dei novèlas musicas tradicionalas e dau monde. Aqueu biais de creacien, Miquèu Montanaro e son enfant Bautesar mé qu forma lo duo « Ki », d’un mòt ongrés qu’a pèr conotacien l’esterioritat tot en servènt pèr interrojar sus l’identitat, nen donava d’eisèmples brilhants dins un climat intime e atentiu.

6. L’identitat provençala si dòrbe au monde : lo camin de la creacien musicala. Miquèu e Bautesar Montanaro

Un filme dau Cep d'Oc, Imatge e montatge Maria-Francesa LAMOTTE

Lei partenàri de l’AELOC au dedins dóu Forum d’Oc avien adu soun councours abituau, pèr sa presènci e pèr la tengudo de taulo presentant lei producien culturalo e pedagougico de cadun. L’Assouciacien l’Aigo Vivo de Rousset a assura un acuei espetaclous demoustrant l’óuriginalita de sa recerco que retravaio la tradicien à travès dóu countempouran e saup li assoucia la jouino generacien.

Fotò Maria-Francesa LAMOTTE

Aigovivo.jpg

Enfin, la recepcien de la Vilo de Rousset, inaugurado pèr l’intervencien de l’Ajoun delega à la Culturo au noum dóu Cònsou, siguè calourouso e irreprouchablo, em’un persounau municipau atenciouna au mendre detai, e l’óuferto d’un aperitiéu generous qu’acabè la journado dins un ambiènt jouious.


Data de creacion : 04/01/2018 16:50
Categoria : Çò que fasèm - Les colloques-Le colloque de 2017
Pagina legida 134202 còps

Reaccions a n'aquest article

Degun a pas encara laissat de comentari.
Siatz doncas lo primièr !

Formulari d'adesion a l'AELOc-pagament securisat amé CB

Per 2024

Propulsé par HelloAsso