Siatz aquí :   Benvenguda » Assemblada generala 2015 -Rendut còmpte
    Estampar la pagina...

Assemblada generala 2015 -Rendut còmpte

Assemblada generala 2015 de l’AELOC

Dissato 20 de Jun à-z-Ais
 

Escusats : Sandy Blanc, Joèu Bouc, Aneta Cottin, Christòu Redon, Romieg Salamon

1. Rapòrt morau, rapòrt d’ativitat

Lei rapòrts son presentats pèr Alan Barthélemy-Vigouroux, secretari de l’AELOC.

L’engajament dins lo Forum d’òc es vengut vuei una realitat abituala. L’AELOC si presènta ara coma una dei composantas fondatriças dau Forum. Aquò a pas borrolat de fons son foncionament, mai a ressarat sei liames, emé lo Felibrige e l’IEO, e tambèn emé l’Associacien dei professors de lenga regionala de l’Academié de Niça qu’aviam gaire de rapòrts em’ela avans. Au dedins dau Forum, lei dos associaciens federadas a la FELCO an pres un ròle centrau dins l’un dei tres chantiers dau Forum, a travès de sa Comissien Ensenhament e Formacien, sènsa li èstre egemonique, e si siam bèn avisats que son foncionament donava a de militants isolats dins son òbra de trasmisssien de la lenga un espaci de comunicacien, d’ajuda recipròca e de sostèn morau. Es estat importènt pèr eisèmple de si presentar ensèms emé l’APLR au gabinet dau presidènt dau Consèu Regionau, pèr demandar l’aplicacien de la lèi en matèri de convencien mé lo Reitorat, e de posquer si presentar coma emissaris dau Forum, es a dire de 140 associaciens, sindicats o coleitivitats. Meme se fau pas esperar de miracles imediats, prenèm una autra dimensien en fasènt jugar, un còup nòstre especificitat e nòstre enracinament, un còup nòstre malhum regionau.

L’afirmacien de nòstra presènci dins lo Consèu Academique dei lengas regionalas es una corsa de fons, mai la costitucien dau Forum a permés de li donar una arma fòrta. Direm mai lo travalh fondamentau fach pèr Sandre Arnaud pròchi dei sindicats : l’adesien dau principau sindicat de professors dau segond degrat au Forum es una òucasien que fau assoludament esplatar e estèndre, e es d’alhors en trin de v’èstre dins l’ensenhament dau promier degrat. Siam en passa d’aguer recampat l’essenciau dei participants dau CARL en defòra deis administratius (associaciens defendènt la lenga d’òc, representants dei coleitivitats localas, sindicats) ; fau ara concretisar son acien pèr nen faire una istança de pressien reguliera sus l’administracien.

S’avèm poscut jugar aqueu ròle au dedins dau movament de defènsa de la lenga, es promier graci a nòstra posicien que nos restaca ai doas tradiciens occitanista e mistralenca, e nòstra aculhènça a totei lei biais de sostenir la lenga, ce que vòu pas dire indiferènci, bòrd que tenèm ferme còntra aquelei que negon son eisistènci. Aquò mi sèmbla un ponch costitutiu de nòstra identitat.

Aquel esperit, lo devèm ai fondators de l’AELOC e pènsi especialament a dos d’entre elei que son plus d’aqueu monde, Guiu Garnier e Lucian Durand. Lucian nos a quitats fa bèn gaire de tèmps, a obrat de lònga pèr raprochar lo movament mistralenc e la tradicien occitanista, li a larjament reüssit, e pas solament dins l’AELOC, mai a nautrei es restat de lònga fidèu, meme quand podié plus tròup si desplaçar pèr nos rejonhe. Pèr saludar sa memòri, vorrieu vos demandar una pensada intènsa pèr eu e de l’esprimar pèr una minuta de silènci.

Nos rèsta de rèndre pus concrèts lei liames emé l’ensenhament tau coma si fa dins leis establiments. Avèm dejà istalat una presènci de la lenga dins leis ESPÉ das Ais, Marselha e Dinha. Vos prepausarem de rejovenir encara mai nòstre consèu d’administracien dins la persona de doas joinei professors. Veirem a n aquela òucasien que lei relaciens emé la Missien de lenga regionala dei Bocas dau Ròse si son ressaradas, a travès dau sucès totjorn creissènt dei Cantejadas, de nòstra participacien a l’edicien dau materiau pedagogique que preconison, e de la preparacien dau colòqui que nen reprenèm aquest an la realisacien.

Lou bilans d’acien de l’annado

a) Leis intervencien en mitan escoulàri 

Jan-Pèire Reynaud e Gièli Maille presènton lou sujèt.

- Teatre : « Lou murmure dóu santoun », creacien AELOC emé Andriéu Gabriel, Jan-Pèire Reynaud e Roumié Salamon : 4 representacien (Cuer, La Seino)

Quesaquò e Mascomprés : 5 representacien (Casan, Faienço, Aurenjo, Cuer, Sant-Louei- lou Rove a Marsiho)

« Le violon des bois » pèr Andriéu Gabriel e Roumié Salamon : 2 representacien (Ais)

Sié : 36 classo, 7 escolo elementàri e 2 coulègi

- Carnavas : 8 escolo an acuï lou Triò Petaçons (Casan, Souliés-Pont, Cavaioun, Digno, Touard, Lou Canet à Marsiho), e douos intervencien refusado pèr manco de tèms ; travai preceda pèr un ataié de danso e cant tradiciounau. Sié : 47 classo meiralo e elementàri

- Animacien sus lei Conte de Prouvènço : Nioun, Vinsobre, Ouresoun, La Mouto dóu Caire, Mirabèu, Barras, Voulouno, Digno (escolo e coulègi), Castelarnous, Auruòu, Ais (Louino, Vau Sant Andriéu), Marsiho Pargue Dromel. 2 classo de coulègi e uno d’elementàri an travaia sus l’escrituro d’un conte

- Preparacien dei Cantejado : Casan, Aubagno, Ais (Platano e Sacrat Couar), Fuvèu, Aureio, Calas : 430 pichoun que participèron ei Cantejado

- Divers : intervencien musicalo d’Andriéu Gabriel (Auruòu) ; vesito coumentado de l’espousicien La Ràbi dei Diéu d’Enric Damòfli à-n-Aurenjo (elementàri, coulègi, licèu)

Recapitulacien : Bouco dóu Ròse : 57 classo primàri de 16 escolo de qunte 8 centre d’ensignamen countinu

Vau-cluso : 19 classo primàri de 4 escolo, 2 classo de coulègi, 2 classo de licèu

Aups d’Auto Prouvènço en partenariat ‘mé l’Assouciacien Escoulàri d’Oc : 43 classo primàri de 12 escolo, 5 classo de 2 coulègi

Var : 23 classo primàris de 3 escolo e 3 classo de coulègi.

b) L’edicien 

Aquest an l’AELOC a pas realisat d’edicien, mai a fach avançar tres progets :

Edicien bilenga italian-provençau dei memòris d’un imigrat italian d’un vilagi de Ligurié, Giambattista Cane, dins la regien marselhesa a la fin dau XIX° siècle. La traducien es estada facha, avèm rescontrat l’editor en Italié, e mai la Cumpanhia dell’Urivu, associacien culturala d’Imperia que s’interèssa especialament a l’occitan e nos a demandat de li prepausar de partenariats dins la Provença òurientala. L’introducien dau librilhon e lei nòtas istoricas son estadas fachas pèr Stephane Mourlane, professor a l’Universitat das Ais, Ostau mediterranenc dei scièncis de l’òme, e lo librilhon comportarà una presentacien comparativa de la morfologié italiana e occitana. Lo tèste serà tambèn anotat coma lo libre de Guiu Garnier en donant lo sèns dei mòts que pòdon pausar dificultat pèr lei debutants.

Coma va rapelavi, la Missien de Lenga Regionala dei Bocas dau Ròse nos a fisat l’edicien dau materiau d’ensenhament qu’a realisat pèr lei classas primaris, e que li dien la Maleta Pedagogica. Eisistava sota una forma encara dispersada, e l’an remanejat pèr nen faire una presentacien plus costrucha. Comprendrà un librilhon dau mèstre pèr l’escòla mairala e un pèr l’escòla elementari, e de contenguts utilisables dins chasque nivèu de l’escolaritat. Lei publicarem a mesura que n’aurem lei mejans financiers.

Enfin, avèm previst d’editar un libre e un CD recampant lei creaciens dei cançons interpretadas dins lei Cantejadas.

Avèm pa’ncar avançat sus lo progèt de reedicien dei librilhons « Langue d’oc et culture régionale à l’école » sus Lo Còrs Uman, la Familha, Novè, Lo Tèmps que passa, lei Nombres ; mai l’avèm pas abandonat, dependrà de nòstrei mejans.

c) Partenariat 

Alan Barthélemy-Vigouroux es delega pèr l’AELOC pròchi l’AGEFOC, Assouciacien de gestien dóu Forum d’Oc, que l’AELOC n’asseguro lou secretariat. Participo ensin ei reünien mensualo de l’AGEFOC, un dimenche de matin pèr mes, emé lei representant de l’IEO, dóu Felibrige e dei Calandreto, e mai lei respounsable dei tres coumissien dóu Forum : Desvoulopamen duradis e poudé loucau ; Culturo e coumunicacien ; Ensignamen e Fourmacien. Lou respounsable d’aquelo darniero èro nouestre coulègo Clàudi Juniot, es aro lou presidènt de l’APLR, Óulivier Pasquetti, qu’a demanda à l’AELOC d’assegura l’interim de sa prestacien jusqu’ei vacanço. La coumissien Ensignamen e Fourmacien s’es recampado dous còup aquest an, un còup à Gassin dins la 2° sessien dóu Forum, un còup à Touloun.

Avèn tambèn un partenariat emé l’Assouciacien Escoulàri d’Oc deis Aup d’Auto Prouvènço (ASOC) e l’IEO deis Aup, noutamen pèr leis intervencien culturalo dins soun relarg, tambèn pèr lou pagamen de l’intervenènt à l’ESPÉ.

Lei Cantejado permeton de partenariat emé lei groupe musicau e leis artisto, lou Centre de fourmacien dei musician intervenènt, lou seitour Musico e sciènci de la musico de l’Universitat.

L’AELOC countunié de participa au Pres dei Jouine restaca au Grand Pres Literàri de Prouvènço ourganisa pèr l’Assouciacien Culturalo Prouvençalo de Ventabren. Tres laureat siguèron chausi pèr lo jurì : l’escolo bilengo de Cuer (creacien d’un libret numerique en prouvençau pèr lo centenàri de la guerra de 14), l’escolo meiralo de Casan (creacien d’un libret numerique d’après un conte), l’escolo meiralo Marìo Mauron de Greasco (creacien d’un conte sus lei bèstis dóu jardin).

Emé la memo assouciacien, l’AELOC ourganiso uno iniciacien à l’óucitan à Ventabren. En partenariat emé lou Groupe d’Estùdi Prouvençau de Cucuroun, un estàgi d’un dissato après dina chasque mes (dous nivèu, descuberto e perfeiciounamen) es tambèn ourganisa. Enfin, nouestro presidènto pago de sa persouno à l’Ostau dau Païs Marselhés mounte fa uno iniciacien ebdoumadàri à l’óucitan.

L’AELOC es partenàri dóu Coumitat Prouvençau de la Santo Baumo, que s’óucupo de manifesta la presènci de la lengo dins lou proujèt de pargue naturau regiounau.

d) Relaciens emé l’Educacien Nacionala

La messa en plaça d’una acien coordonada es quauqua-rèn que demandarà de tèmps, mai avèm avançat sus lo changi d’informaciens, sus la definicien de revendicaciens prioritaris, e sus la messa en plaça d’una metòda alentorn dei CALR.

Dins la Vauclusa, lo mieg-tèmps d’Aneta Cottin es pas estat remés en causa. Lo problèma de la derogacien pèr permetre ais escolans de la Calandreta d’anar au colègi monte ensenha Matieu Poitavin es totjorn pas reglat. Un corrier de protestacien es estat mandat pèr l’AELOC, un autre va serà pèr lo Forum, en liame emé l’IEO e lo Felibrige.

Dins lei Bocas dau Ròse, un dei quatre pòstes de la Missien Lenga Regionala, aqueu costituat pèr lo destacament de Sandy Blanc, es estat suprimat. Mema modalitat de protestacien.

L’AELOC a participat en la persona de son vici-presidènt Michèu Neumuller au Consèu Academique de la lenga regionala as Ais e a la comissien de la lenga regionala a la Direicien dei Servicis Academiques de l’Educacien Nacionala dei Bocas dau Ròse a Marselha.

Dina la darniera sessien de la comissien Ensenhament e Formacien dau Forum, es estat decidat de mandar lo rendut-còmpte de la sessien dau CALR a totei lei participants. Aqueu rendut-còmpte es estat establit pèr lo SNES emé d’ajusts de Natalia Wurbel, e presentat au nom dau Forum. Aquò permetrà que lei participants espèron pas la sessien d’après pèr aguer lo rendut-còmpte dau Consèu Academique. En meme tèmps es una etapa pèr establir una comunicacien permanenta entre lei membres, dins la perspetiva de posquer renforçar nòstrei revendicaciens. Lo rendut-còmpte es estat mes sus lo site de l’AELOC.

L’AELOC a finançat a l’ESPÉ de l’Academié das Ais-Marselha trenta oras de cors costituant una unitat d’ensenhament opcionala a bonus pèr leis estudians de 1° anada dau master Mestiers de l’ensenhament, de l’educacien e de la formacien, aquò dins lei centres das Ais, de Marselha e de Dinha. L’acien a pas poscut començar a n Avinhon pèr de resons d’empachas administrativas pèr Aneta Cottin. Marc Rivoira qu’aurié poscut la remplaçar s’es presentat tròup tard pèr metre en trin l’acien.

Après discussien emé Frederic Saujat, direitor ajonch cargat de la recèrca e de l’inovacien, ai mandat un corrier au direitor generau pèr li rapelar que nos falié sinhar una convencien pèr regularisar leis intervenciens, nen faire lo bilanç, prevèire l’avenir. Una reunien emé la direicien es demandada.

e) Relaciens emé la FELCO

Siam sòcis coma sabètz de la Federacien deis Ensenhaires de lenga e de cultura d’òc. A n aqueu titre si siam jonhuts a la protestacien qu’a entrinat sus lei disposiciens de la reforma dei colègis e l’avèm mandada en totei lei deputats e senators de la regien.

Sandre Arnaud s’es encargat despuei d’anadas d’assegurar lei relaciens emé la FELCO e de nos representar dins seis instancis, e l’en remerciam. Siam pas totjorn plenament unanimes mé la FELCO, serié que pèr nòstra composicien : la FELCO recampa solament leis ensenhaires publiques, nautrei sian dobèrts tambèn a n aquelei de l’ensenhament associatiu, dau privat, dei formators d’adultes professionaus o benevòles, e dei militants o simpatisants de la demarcha de trasmisssien de la lenga. En mai d’aquò nòstre engajament totau dins lo Forum nos impausa de recercar la melhora entènta tant emé l’IEO que lo Felibrige e plus globalament totei lei movaments que costituen lo Forum. Quand li a conflit entre la FELCO e d’autrei composantas dau movament regionalista, si siam totjorn esforçats d’aguer la posicien que contribuava lo miés a nòstre avìs a la concòrda. Sus un dei ponchs monte la FELCO s’es crosada emé l’IEO, lo progèt de manifestacien a Montpelhier, aviam pres l’an passat aquela posicien que vos rapèli : « Li a manifestament un desacòrd sus la forma de la manifestacien mai que mai entre la FELCO e l’IEO. L’AELOC ajudarà lo progèt que serà retengut ».

La discussien s’engajo sus lou raport mourau e lou raport d’ativita. Hervé Guerrera rapello lou role qu’a agu emé leis àutreis elegi favourable à la Causo pròchi lou Counsèu Regiounau. Lei Convencien de Vido liceano e aprentido soun aro douberto à la lengo regiounalo, e soun estado utilisado pèr nouestre coulègo Deidié Maurell pèr soun proujèt « Lei Viajaire dóu Rose » e pèr lou proujèt tiatre de nouestre coulègo Matieu Poitavin. Presènci de la lengo tambèn dins leis oúperacien « Le monde est chez nous », que va countunia de s’espandi. Après la recounouissènço pèr l’Estat de l’Óufici Publique de la lengo óucitano, Hervé Guerrera es estat manda pèr representa Michèu Vauzelle à la reünien de prefiguracien de l’Óufìci, nouestro regien li aguènt toujour pa’nca adera. Dins soun acien au counsèu municipau de-z-Ais e à la souto-presidènci de l’Oustau de Prouvènço, va rescountra Soufìo Joissains pèr jita lei baso dóu proujèt d’istalacien materialo dóu Forum d’O, emé l’utilisacien dei founs dóu Countrat de Plan Estat-Regien, mounte la lengo regiounalo es estado mantengudo gràci à-n-uno acien revendicativo. Enfin, a pouscu sousteni eficaçamen lei demando de subvencien de l’AELOC, qu’èron estado menaçado à la Regien. Au Consèu despartamentau dei Bouco dóu Rose, la delegacien d’Andriéu Guinde es estado sauvado dins la passassien de poudé à Bruno Genzana souto lou titre « delegacien à la lengo d’o e ei tradicien prouvençalo ».

Michèu Arnaud rapello que l’AELOC fa partido dóu Counsèu d’Óurientacien dóu Pargue de la Santa Bauma, qu’avèn reussi de fa marca dins lou proujèt un noumbre significatiéu de mesuro pèr la lengo, emai qu’avèn fa restabli lei mesuro refusado. Michèu Neumuller fa remarca qu’es lou proumié còup que sueivèn de longo uno demarcho esteriouro e qu’a pourta sei fru.

Lou raport mourau e lou raport d’ativeta soun aprouva à l’unanimita.

2. Bilans financié

Lou clavaire Jan-Pèire Reynaud espauso lou bilans financié de l’AELOC. La situacien financiero es sano. Lei comte soun aprouva à l’unanimita.

L’AELOC comto un pau men d'aderènt à la data de l’assemblado. Uno relanço es previsto.

3 Lei progets

a) Proposiciens culturalas ais establiments

Lei progèts culturaus seran reconduchs dins sei grandei linhas. Lei Cantejadas si debanon totei lei dos ans as Ais, mai es questien de lei trasposar dins leis Aups d’Auta Provença pèr l’an que vèn ; de relaciens emé lo conselher pedagogique de musica son estadas establidas.

Faudrà faire a la rintrada una publicitat sus lei Convenciens de vida liceana e aprentidas, que permeton de finançar d’un biais consequènt de progèts sus la lenga e la cultura d’òc.

b) Relaciens emé l’Educacien Nacionala

Sus aquò podèm rapelar que la comissien Ensenhament e Formacien dau Forum dins sa darniera reünien a Tolon a donat coma òrdre de prioritat :

- l’ensenhament dins leis ESPÉ

- l’ensenhament dins leis escòlas primaris

- lo desvolopament dau liame emé lo segondari

L’ensenhament dins leis ESPÉ es adonc pèr nautreri la prioritat, e deurà èstre proposat pèr l’AELOC dins la mesura de sei mejans.

Pèr lo rèsta, assegurarem la sueita de nòstra acien atuala : ajuda ais ensenhaires e responsa a sei problèmas ; denonciacien dei disfoncionaments e protestaciens contra lei mesuras negativas ; participacien ais istancis de concertacien ; desvolopament dau travalh emé lei participants istitucionaus ai comissiens academicas.

Devèm s’ajudar de nòstrei partenariats e de la fòrça dau Forum pèr presentar e far avançar nòstrei revendicaciens principalas, portant sus :

- la formacien iniciala e professionala dei mèstres e son recrutament (ESPÉ, mai tambèn a l’Universitat) ;

- la regularisacien dei moiens eisistènts sus tot lo territòri academique e regionau :

- au mens un pòste entier de conselher pedagogique consacrat unicament a la lenga d’òc dins chasque despartament ;

- una comissien despartamentala de la lenga regionala dins chasque despartament ;

- l’estensien de l’estatut deis escòlas semi-bilengas dei Bocas dau Ròse a tota la regien ;

- l’espandiment de l’òufèrta d’ensenhament  pèr la definicien de politicas academicas e despartamentalas metènt en plaça un plan de desvolopament de la lenga ;

- recercar de que biais lo movament associatiu en generau pòu sostenir lo desvolopament de la lenga.

- l’aplicacien de la lei pèr l’establiment de convenciens entre lei consèus despartamentaus e lo consèu regionau emé lei reitorats.

Siam solicitats pèr participar au progèt organisat pèr la delegacien a la lenga provençala dau Consèu Despartamentau deis Aups d’Auta Provènça (Genevièva Primiterra e Pèire Bonet) e lo CDDP de Dinha (nòstre colèga Alan Garcia) de faire una jornada pèr l’ensenhament lo dimècres 14 d’Outòbre. Pèire Bonnet e Genevièva Primiterra seràn a l’Escòla Occitana d’Estiu au Fugeret lo 30 de Julhet.

Rèsta la questien de la demanda d’intervenènts pèr leis ativitats periescolaris, que pèr lo moment a pas de solucien.

c) Partenariat

Devèn recoundurre l’ensèn de nòstrei partenariat.

Devèn tambèn participa à l’espandimen de la tiero dei membre dóu Forum, e especialamen en cultivant la relacien emé lei sindicat dins lo biais que Sandre a tant bèn reüssi emé lo SNES.

d) Edicien

La priourita serà dounada à l’edicien de la Maleto Pedagougico en founcien dei mejan de l’AELOC e dei priouritat chausido pèr la Missien de lengo regiounalo.

Deurian pousqué mena à bèn l’edicien dei memòri de Giambattista Cane.

Lei proujèt d’edicien dóu librihoun dei Cantejado e de reedicien dei libret « Lengo d’o et culturo regiounalo à l’escolo » dependran dei mejan financié.

Enfin avèn pas avança sus lou proujèt d’introudurre l’óucitan dins la metodo d’ensignamen simultanèu dei lengo roumano Eurom 5, que demando de mejan impourtènt.

e) Lo colòqui

Lo colòqui si tendrà a n Eigalièra lo dissata 14 de Novèmbre dins lo tantòst. Dos moments : una presentacien de la situacien de l’ensenhament dins la regien, emé coma intervenènts leis ators dau sistèma : conselhers e animators pedagogiques dau promier degrat, professors dau segond degrat, etc. Seran naturalament invitats leis autoritats academicas e lei sindicats d’ensenhaires. Pèr ilustrar la discussien, aviam demandat au CEP d’Oc de faire un filme cort pres dins lei classas, lo rèsta dei pressas de vista podènt èstre utilisadas dins la formacien dei mèstres. La missien de lenga regionala dei Bocas dau Ròse avié retengut una desena d’escòlas. Estènt la malautié de Jan-Pèire Belmon, avèm demandat a Jaufré Dargent-Bizot e a son associacien Solèu Production de filmar una jornada dins doas escòlas, l’elementari de La Barca a Fuvèu e la mairala Maria Mauron a Greasca, que son de centres d’ensenhament continus de la lenga regionala. Porrem rajustar, pèr faire lo liame emé lo tèma, un montagi sus lei Cantejadas e, pèr eisèmple, de l’espetacle montat pèr Deidier Maurell emé la participacien de l’AELOC sus lo Poèma dau Ròse. Deurem estudiar la possibilitat de contunhar la demarcha de filmagi dins lei classas pèr nen faire de documents pedagogiques.

Puei vendrà lo sugèt especifique dau colòqui. Lo titre previst èra : la lenga d’òc e la musica tradicionala de creacien : qunteis apòrts pèr la trasmissien de la lenga. Mai Gièli Maille fa remarcar que la presènci de la lenga si limita a la cançon, e prepausa la formulacien : la lenga d’òc dins la cançon contemporana. Ensin siegue.

Avèm dejà imaginat una presentacien generala dau sugèt pèr un especialista universitari, puei un debat emé de musicians qu’an la preòucupacien de trasmetre la lenga en mitan escolari o plus larjament. Avèm dejà la participacien de Pèire Bonnet, Magalì Bizot, Felipe Franceschi, Liza, Miquèu Montanaro, Gièli Maille, Deidier Maurell, Maria-Noëla Pieracci, Jan-Bernat Plantevin.

Coma a l’ordinari, li aurà de stands de vènta de libres e documents, e terminarem pèr la prestacien dau grope Còr de Lus, avans l’aperitiu finau. Aurem evocat a n un moment lo sovenir de Guiu Garnier e de Lucian Durand.

Pèr l’organisacien materiala dau colòqui, avèm besonh d’una equipa devoada, e vos demandam de vos engajar dre que possible sus vòstra presènci.

f) Relacien ‘mé la FELCO

La couourdinacien Anem, òc, qu’ourganisavo lei manifestacien de Carcassouno, Besiers e Toulouso, e qu’acampavo l’IEO, lou Felibrige, la FELCO, la Federacien dei Calandreto e Oc-bi, s’es desseparado. L’IEO e lei Calandreto an adounc fourma uno Coordinacion per la lenga occitana, e es elei qu’apèlon à manifesta à Mount-Pelié lo 24 d’Óutobre, uno manifestacien centrado sus la demando d’uno lèi pèr lei lengo regiounalo. Naturalamen, lou Couleitiu Prouvènço a decida d’ourganisa uno manifestacien à-n-Arle lou meme jour. Lou Felibrige a decida de leissa à sei membre la liberta d’ana mounte vourrien, mai la Mantenènci de Prouvènço ourganiso un coulòqui lou meme jour à Seloun. La FELCO èro oupousado à l’idèio d’uno manifestacien naciounalo surtout à Mount-Pelié, pèr de resoun multiplo, e proupousavo que la journado siegue remplaçado pèr uno pluralita de manifestacien dins lei diferèntei regien.

A sembla que l’AELOC avié de sousteni la manifestacien de Mount-Pelié, vesènt pas de que servirié de la faire cabussa, mai d’afirma que lei pousicien soun pas incoumpatiblo, en plaço de lei faire councurrènto. Proun de mounde anaran pas à Mount-Pelié, e s’ourganison quaucarèn au siéu à-n-aquéu moumen en soustèn à la manifestacien naciounala pèr lei sedentàri en coumunien emé lei defilaires, sera un benefìci generau.

Lou tèste sueivènt es vouta à l’unanimita :

L’AELOC convida seis aderènts e simpatisants a si rèndre prioritariament a la manifestacien organisada a Montpelhier pèr la Coordinacien pèr la lenga Occitana lo 24 d’Outòbre, sus la reclamacien d’una lèi pèr lei lengas de França e la ratificacien de la Charta europenca dei lengas regionalas, e d’assurar lo pus grand sucès a n aquela manifestacien. Pasmens pèr aquelei que porran pas li anar, sovetam que pòscon organisar lo meme jorn, en sostèn a la manifestacien nacionala, d’ativitats de promocien de sei revendicaciens pèr la lenga dins lo mai d’endrechs possible.

4. Questiens divèrsas

La questien de l’ensenhament a l’ESPÉ es totjorn en chantier. Natalia Wurbel a pausat la questien au Direitor e rapèla que Gaëla Lenfant representa lo Consèu Regionau au Consèu d’escòla de l’ESPÉ. Sandre Arnaud rapèla la demanda facha pèr la FSU de descarga un professor pèr coordonar l’acien en favor de la lenga dins leis Aups d’Auta Provença. La demanda siguèt refusada pèr lo DASEN. Dos volontaris, Cecilia Pelissier e Pascau Recotillet, serien lèsts de li consacrar una jornada cadun dins la semana s’èron descargats de classa aqueu jorn,ce que revendrié a n un mieg-pòste.

5. Eleicien dau Consèu d’Administracien

La tiera que si presènta compren lei 15 membres prevists coma nombre massimom pèr leis estatuts.

Sandy Blanc

Mirelha Combe

Aneta Cottin

Frederica Durand

Marie-Francesa Lamotte

Sarah Laurent

Glaudeta Occelli

Natalia Wurbel

Alan Barthélemy

Joèu Bouc

Gièli Maille

Michèu Neumuller

Matieu Poitavin

Michèu Prat

Jan-Pèire Reynaud

La tiera es elegida a l’unanimitat.

Eleicien dau burèu :

Presidènta : Mirèlha Combe

Vici-Presidènts : Natalia Wurbel, Gièli Maille, Michèu Neumuller

Clavaire : Jan-Pèire Reynaud

Secretari : Alan Barthélemy-Vigouroux

Secretari ajoncha : Maria-Francesa Lamotte

5. Oumagi a Sandre Arnaud.

L’assemblada generala rènde òumagi a Sandre Arnaud pèr son òbra en favor de la lenga e son implicacien fonsa dins lei projèts de l’AELOC. Li sovetam una plena reüssita dins l’Academié de Clarmont monte s’entòrna.

La sessien s’acabo m’un aperitiu amicau.


Data de creacion : 17/07/2015 11:51
Darriera modificacion : 19/07/2015 19:10
Categoria : Çò que fasèm - Vida associativa
Pagina legida 34543 còps

Formulari d'adesion a l'AELOc-pagament securisat amé CB

Per 2024

Propulsé par HelloAsso