Siatz aquí :   Benvenguda » Viatge escolar dins lei valaas occitanas d'Itàlia
    Estampar la pagina...

Viatge escolar dins lei valaas occitanas d'Itàlia

Viatge escolar dins lei valaas occitanas

 

Lei collegians e liceans de Castèu-Arnós, Dinha e Gap son tornats este divendres de sera d'un viatge escolar de tres jornaas que leis a menats dins lei valaas occitanas d'Itàlia.

Un projècte rendut possible amé l'ajuda de L’AELOC.

 

      Lei 47 escolans d'occitan dei tres vilas son partits dimècres 4 d'abrièu de matin. An fach un arrest a Gap, ont Dòna Henri e leis escolans dei collègis Fontreyne, Mauzan e Centre an mostrat a sei cambaradas lo centre ancian de la vila, amb d'explicas sus lo sens dei noms occitans dei plaças e charrièras.

      Lo vèspre, an totei descobèrt Mont Daufin, la construccion de Vauban. Per còlas, an respondut a un questionari.

      Son arribats au Serre Chavalièr per la nuèch, ont leis escolans de chasque establiment, ajuats per sei professors, se son presentats dins la lenga, peréu sa vila, son collègi, sei gosts... davans una velhaa ont an pogut dançar.

 

      Es lo lendeman que son arribats dins la Vau Germanasca, ò Vau Sant Martin, coma li a presentat la guida de la Scuola Latina. Dins lo musèu, l'exposicion cònta la vida tan dura dins la vau, d'autrei còps, amb de miniaturas, e amb un filme. La presentacion se faguèt en occitan e en francés.

      Lo vèspre, an visitat la mina de pèira doça (talc) de Prali. Son davalats amb un trin a un quilometre sota la tèrra. An vist lei condicions de trabalh dei minaires.

2012viatgeoccitan1.jpg

 

      Lo tresen jorn, an visitat lo musèu nacionau dau cinèma de Turin, amb una mòstra sus l'istòria dau cinèma, e an pres l'ascensor panoramic que li a permés de descobrir lo ponch sus la ciutat e lei brecs d'Aups.

 

2012viatgeoccitan2.jpg

 

      Es estat puèi lo moment de tornar. Leis escolans son estats ben urós de son viatge escolar que s'es ben debanat. Son dintrats dins sei familhas amb la tèsta plena de sovenirs e dau chant de la lenga e de la cultura d'òc.

Lei professors qu'an organizat e accompanhat lo viatge:
Dòna Mariaud (Gap), Dòna Henri (Gap), Dòna Hermitte (Dinha) e Sandre Arnaud (Dinha e Castèu Arnós)

 


Data de creacion : 29/05/2013 21:47
Categoria : Ensenhament - Dins lei classas...
Pagina legida 57268 còps

Formulari d'adesion a l'AELOc-pagament securisat amé CB

Per 2024

Propulsé par HelloAsso